குறுஞ்செய்திகள்-251

என்னவளே

மதுவும் மாதுவும்தான்

மனிதனைக் கெடுக்கும்

போதை என்று சொன்னேன்

அடடா

அவைகளை விடவும்

கொடுமையான போதை

புகழ் போதை! என்கிறாய்

குறுஞ்செய்திகள்-250

என்னவளே

முன்பெல்லாம் அமைதிதேடி

நகர நரகத்திலிருந்து தப்பித்து

கிராமம் நோக்கி செல்வேன்!

அடடா

இப்போது என்கிராமமும்

தன்முகம் தொலைத்துவிட்டு

நரகமாக அல்லவா மாறிவருகிறது! 

குறுஞ்செய்திகள்-249

என்னவளே

நீ நினைத்ததைப்போல

நான் இல்லாத ஏக்கத்தை

எப்படித்தான் தாங்குகிறாயோ?

அடடா

மீண்டும் நிகழமுடியா

இறந்தகாலம் வெளிப்படுகிறது

நீண்ட உன் பெருமூச்சினில்!

குறுஞ்செய்திகள்-248

என்னவளே

ஊர் போய் திரும்புகையில்

சொர்கத்தை பார்த்த மாதிரி

ஆனந்தம் ஏன்? என்கிறாய்

அடடா

தொடக்கக்கல்வி பயின்ற

பள்ளிக்கூடத்தை விட

சொர்க்கம் இருக்கிறதா என்ன?

குறுஞ்செய்திகள்-247

என்னவளே

பெருமழைக்காலம் தவிர்த்து

பெரும்பாலும் நீரில்லாமல்

வற்றியே கிடக்கிறது ஆறு!

அடடா

ஆற்றுத்திருவிழாவின் போது

அணையைத் திறந்தால்

அதுவே போதும் நமக்கு!

குறுஞ்செய்திகள்-246

என்னவளே

எப்போதும் கணினி

இடையிடையே தொலைக்காட்சி

பாவம் இளந்தலைமுறை!

அடடா

பஸ் ஆட்டம் மிஸ் ஆட்டம்

ஐஸ் ஆட்டம் கல் ஆட்டம்

எவ்வளவு இழந்துவிட்டார்கள்?

குறுஞ்செய்திகள்-245

என்னவளே

இனிமையானது எது?

கொடுமையானது எது?

விடைசொல் என்று கேட்டேன்

அடடா

இரண்டுக்கும் விடை தனிமை!

நாமே தேர்ந்தெடுத்த தனிமை!

பிறர் பரிசாக கொடுத்த தனிமை!

குறுஞ்செய்திகள்-244

என்னவளே

நடக்கையில் உரையாடுவது

இரு இடங்களுக்கு இடையே

இடைவெளியை பாதியாக்குகிறது!

அடடா

சண்டையில் உரையாடுவது

இரு மனங்களுக்கு இடையே

இடைவெளியை இரட்டிப்பாக்குகிறது!

குறுஞ்செய்திகள்-243

என்னவளே

பெற்றோர்க்கு பிள்ளைகளாக

இருக்கும் வரை அவர்களையே

நினைத்துக் கொண்டிருக்கிறோம்!

அடடா

நாம் பெற்றோரானதும்

நம் பெற்றோர்களை

மறந்து அல்லவா விடுகிறோம்?

குறுஞ்செய்திகள்-242

என்னவளே

நத்தை இறைச்சி தின்றால்

மூலம் சரியாகுமென்பது

உண்மையா? என்று கேட்டேன்

அடடா

எந்த இறைச்சியையும்

தின்னாமல் விட்டாலே

மூலம் சரியாகிவிடும்! என்கிறாய்

குறுஞ்செய்திகள்-241

என்னவளே

அடூர் கோபால கிருஷ்ணனை

திடீரென்று புரட்டிப்போட்டது

பதேர் பாஞ்சாலி திரைப்படம்!

அடடா

சும்மா இருந்த என்னை

இல்லறத்தில் இழுத்துப் போட்டது

தரகர் தந்த உன் புகைப்படம்!

குறுஞ்செய்திகள்-240

என்னவளே

மனசில் என்ன

பெரிய கொம்பன் என்று

நினைப்பா உனக்கு? என்கிறாய்

அடடா

மூக்குக்கொம்புக்காக

கொல்லப்பட்டு அழிந்துபோன

காண்டாமிருகத்தை நினைவூட்டுகிறாயோ?

குறுஞ்செய்திகள்-239

என்னவளே

எனது ஊர் எது? என்று

என்னிடம் கேட்பவர்களிடம்

என்ன பதிலை சொல்வேன் நான்?

அடடா

அம்மாவின் சொந்த ஊரையா?

அப்பாவின் சொந்த ஊரையா?

உத்தியோக நிமித்தமுள்ள இவ்வூரையா?

குறுஞ்செய்திகள்-238

என்னவளே

எல்லோருக்கும்

முதல் படைப்பு

மிகச் சிறப்பு! என்றேன்

அடடா

மூத்த மகளைத்தானே

குறிப்பிடுகிறீர்கள் என்று

இப்படியா கிண்டலடிப்பாய்?

குறுஞ்செய்திகள்-237

என்னவளே

அனுபவமிருந்தும்

அணைக்கத் தெரியாமல்

அடிக்கடி அவதிக்குள்ளாகிறேன்!

அடடா

இதை முதலில்

கற்றுக்கொள்ள வேண்டும்

இந்த செல்லிடப் பேசியில்!

மா...

மா...

எனக்கு மிக மிக

பிடித்த பழம்!

உண்ணாமல்

நினைத்து பார்த்தாலே

உமிழ்நீர் சுரக்கும் என்பதாலோ

தமிழ் இலக்கியத்தின்

முக்கனிகளுள்

முதற்கனி என்பதாலோ

கடவுளர்களின் உணவென்று

பண்டைய வேதங்களில்

குறிப்புகள் உள்ளதாலோ

உலக அளவில்

பெருமளவில்

விளைவிக்க படுவதாலோ

சர்க்கரை புரதம்

உயிர்ச்சத்துக்கள்

நிறைந்து உள்ளதாலோ

என்று நீங்கள்

நினைத்திருந்தால்

நான் பொறுப்பல்ல!

உச்சரிக்கும் போது

என் அம்மாவை

நினைவு படுத்துவதால்

மா...

எனக்கு மிக மிக

பிடித்த பழம்!