அரசுப்பள்ளி...

பல்லவி

அன்னா ஆவன்னா சொல்லிக் கொடுத்தது அரசுப் பள்ளிதான்
எங்கள் அணு விஞ்ஞானி அப்துல் கலாமும் அரசுப் பள்ளிதான்

அன்னா ஆவன்னா சொல்லிக் கொடுத்தது அரசுப் பள்ளிதான்
எங்கள் அணு விஞ்ஞானி அப்துல் கலாமும் அரசுப் பள்ளிதான்

உணவைத் தந்ததும் இப்பள்ளிதான்
உடையைத் தந்ததும் இப்பள்ளிதான்

உணவைத் தந்ததும் இப்பள்ளிதான்
உடையைத் தந்ததும் இப்பள்ளிதான்

குப்பனும் சுப்பனும் படித்து வளர்ந்தது அரசுப் பள்ளிதான்
அட சாதியும் பேதமும் இல்லாத ஓரிடம் அரசுப் பள்ளிதான்

குப்பனும் சுப்பனும் படித்து வளர்ந்தது அரசுப் பள்ளிதான்
அட சாதியும் பேதமும் இல்லாத ஓரிடம் அரசுப் பள்ளிதான்

சரணம்-1

கையிலே காசில்லா
ஏழைங்க யாரும்
படிப்பதெப்படி சொல்லுங்க நீங்க

அரசுப்பள்ளி வாசலையே மிதித்துவிட்டால் போதும்
அத்தனையும் இலவசம்தான் வாங்க

கட்டணக் கொள்ளை
 மனப்பாடத் தொல்லை
 தனியார்ப் பள்ளியில்
நிறைஞ்சிருக்கு

அரசுப் பள்ளி
 இருப்பதால் தானே
அனைவருக்கும் கல்வி
கிடைச்சிருக்கு

அட பள்ளிக்கூடம் வரமாச்சு படிப்பெல்லாம் உரமாச்சு
அரசுப்பள்ளி யாலே மாணவர்
வாழ்க்கை தரமாச்சு

அட அரசுப்பள்ளி யாலே மாணவர் வாழ்க்கை தரமாச்சு!

சரணம்-2

ஏகப்பட்ட தன்னலமற்ற
நாட்டுப்பற்று இளைஞர்கள்
அரசுப்பள்ளி கொடுத்தது உண்மை

அரசுப்பள்ளி இருந்ததால்தான்
அடுப்படியைத் தாண்டி
புத்தகத்தை ஏந்தியது பெண்மை

இரவு பகல் உழைத்து
 காசு பணம் சேர்த்து
 தனியாரில் சேர்ப்பது
நட்டமுங்க

வாழ்க்கைக்கு இங்கே
 தன்னம்பிக்கை வேணும்
 அரசுப் பள்ளியே
கொடுக்குமுங்க

கல்வி நமது உரிமையாகும்
 கேட்டுப் பெறுவது கடமையாகும்
தனியார் பள்ளியில்
தண்டம் அழுவது
 நமது மடமையாகும்

அட தனியார் பள்ளியில்
தண்டம் அழுவது
 நமது மடமையாகும்!

-கு.சீனுவாசன் ப.ஆ

இந்திரன் வந்ததும் சந்திரன் வந்ததும் இந்த சினிமாதான்...பாடல் மெட்டு

மெட்டுப்பாடல்-37

தமிழ்த்தாயை அழைக்காத வாயில்லையே!

தமிழ்த்தாயை அழைக்காது வாழ்வில்லையே!

இன்றும் என்றும் தமிழ்ப்போல

பொன்றா புகழ்க்கொண்ட வேற்று மொழி ஏது?

சங்கங்கள் வளர்த்தவள் நீ சிந்தையிலே நிறைந்தவள் நீ

காப்பியனை ஈன்றவளும் நீதானம்மா

அன்புடைய அகத்தாள் நீ போருடைய புறத்தாள் நீ

உலகத்தின் பொதுமறையே நீதானம்மா

காவியங்கள் கொண்டவள் நீ கணினியையும் கண்டவள் நீ

தீதும் நன்றும் உரைத்தவளே நீதானம்மா

செம்மொழியாய் ஆனவள் நீ மின்மொழியாய் ஆனவள் நீ

உலகத்தின் முதல் மொழியே நீதானம்மா

உன்னாலே வளர்ந்தோமே!

எழுத்தும் நீ சொல்லும் நீ பொருளும் நீ யாப்பும் நீ

அணியோடு அழகாக இருக்கின்றாய் நீ

மேகலை நீ சிலம்பும் நீ வளையும் நீ குண்டலம் நீ

மணியோடு காப்பியமாய் இருக்கின்றாய் நீ

அமுதாக இயலோடும் இசையோடும் நாடகத்தை

இப்போதும் தந்தபடி இருக்கின்றாய் நீ

அறத்துக்கும் பொருளுக்கும் மகிழ்வுக்கும் அலங்காரம்

எப்போதும் செய்தபடி இருக்கின்றாய் நீ

உன்னாலே சிறந்தோமே!

(அம்மா என்றழைக்காத உயிரில்லையே என்ற பாடல் மெட்டு)

மெட்டுப்பாடல்-36

சகியே உன்னை மறந்து விட்டேன்

வாழும் பொழுதிலே இறந்து விட்டேன்

புதிதாய் இன்று பிறந்து விட்டேன்-அந்த

பழைய நினைவுகளை துறந்து விட்டேன்

உந்தன் முகவரி தொலைப்பதற்கு

எத்தனை தவங்கள் புரிவதடி?

மறதியை படைத்த இறைவனுக்கு

நன்றி நன்றி நன்றியடி!

துல்லியமாக அந்த நொடி

நினைத்துப் பார்த்தேன் நினைவில் இல்லை

மெல்லியதாக மீசை முடி

அரும்பிய நாட்கள் அது உறுதி!

அந்த நாள் முதல் இன்று வரை

உந்தன் பெயரைக் கேட்ட உடன்

சட்டென்று மின்னல் வெட்டுவதை நான்

எங்கனம் எங்கனம் ஒளித்து வைப்பேன்?

திடும் என பாம்பினை பார்த்தவுடன்

படக்கென்று துள்ளிக் குதித்ததுண்டா?

சுடும் ஒரு பொருளினை தொட்டவுடன்

வெடுக்கென்று விரல்களை இழுத்ததுண்டா?

அறிவியல் உலகம் இதன் பெயரை

அனிச்சை செயல் என்று சொல்கிறது!

அனிச்சை செயலைப் போல் உன்நினைவு

தானாய் நிகழ்ந்து கொல்கிறது!

(எவனோ ஒருவன் வாசிக்கிறான் என்ற பாடல் மெட்டு)

பள்ளி சாராக் குழந்தைகள் 2015 பேர் உலக சாதனை முயற்சி

விழுப்புரத்தில் அனைவருக்கும் கல்வித் திட்டத்தின் முயற்சியில் பள்ளி சாராக் குழந்தைகள் 2015 பேர் இணைந்து அசிஸ்ட் (உதவும் உலக சாதனையாளர்கள் ஆய்வு நிறுவனம்) உலக சாதனை முயற்சியில் ஈடுபட்டனர்.

இதில், 15 கஸ்தூரிபா காந்தி பாலிகா வித்யாலயா மைய மாணவிகள், 16 உண்டு உறைவிட சிறப்புப் பள்ளியைச் சேர்ந்த மாணவ, மாணவிகள் என 2015 பேர் இணைந்து இந்த சாதனையில் ஈடுபட்டனர்.

நிகழ்ச்சியில், அனைவருக்கும் கல்வித் திட்ட முதன்மைக் கல்வி அலுவலர் சுவாமிநாதன் வரவேற்றார். பயிற்சி ஆட்சியர் பிரபுசங்கர் தலைமை வகித்தார்.

உதவி திட்ட அலுவலர் ராமமூர்த்தி, உதவும் உலக சாதானையாளர்கள் ஆய்வு நிறுவனம் (அசிஸ்ட்) அதிகாரிகள் நிறுவனர் ராஜேந்திரன், செயல் மேலாளர் தமிழன்பன், மாவட்ட ஒருங்கிணைப்பாளர் அருள்தாமஸ் உள்பட பலர் பங்கேற்றனர்.

இதில், 2015 மாணவர்கள் 15 விதமான சாதனைகளைச் செய்து காட்டினர். இவர்கள் மரம் வளர்ப்பது, தூய்மை இந்தியா திட்டம், எய்ட்ஸ் விழிப்புணர்வு, அனைவருக்கும் கல்வி உள்ளிட்ட பல்வேறு விழிப்புணர்வு அட்டைகளை ஏந்தி 2015 நொடிகளில் இச் சாதனையை நிகழ்த்தினர். அதேபோல, 2015 மாணவர்கள், 2015 நொடிகளில் தங்கள் தனித் திறனையும் காட்டினர். பின்னர், இவர்களுக்கான விளையாட்டுப் போட்டிகள் நடைபெற்றன.

மேலும், 2015-ஆம் ஆண்டை குறிக்கும் வகையில் 2015 மாணவ, மாணவிகள் இந்தியா வடிவில் நின்றிருந்தனர். இந்நிகழ்ச்சியில், மாவட்ட ஒருங்கிணைப்பாளர்கள் பாக்கியராஜ், சந்திரசேகர், ஜெயச்சந்திரன், மதிவாணன் உள்பட பலர் பங்கேற்றனர்.

322ஆலகோ மந்திரம் தெரியுமா?

ஒரு எட்டு இலக்க எண்ணைக் கொடுத்து அதன் எண்பெயர் கேட்டால் மீத்திறன் மிக்க மாணவர்களைத்தவிர்த்து மீதி அனைவரும் அந்த எண்ணின் பெயரை சட்டென்று வாசிப்பதற்கு தடுமாறுபவர்களாகவே இருக்கின்றனர்.

அவர்களுக்கு அதிகப்படியான பயிற்சி கொடுக்கவே இந்த 322ஆலகோ மந்திரம்!

இந்த மந்திரம் எப்படி வேலை செய்கிறது என்பதை சோதித்துப் பார்த்துவிட்டு தங்கள் பின்னூட்டத்தை அளித்தீர்களானால் மேற்கொண்டு என்னுடைய கணித முயற்சிகளை தொடர்வதற்கு அது உதவிகரமாக இருக்கும்.

சரி இப்போது மந்திரத்துக்கு வருவோம்!

ஒரு எட்டு இலக்க எண்ணை எடுத்துக்கொள்வோம்.

12345678-வலமிருந்து இடமாக 3இலக்கங்கள் பின்பு 2இலக்கங்கள் பின்பு மீண்டும் 2இலக்கங்கள் தள்ளி காற்புள்ளி இட வேண்டும் என்பதை வலியுறுத்தவே 322 என்று கொடுத்துள்ளேன்.

அடுத்தபடியாக மூன்றிலக்க எண்ணைப்படிப்பதில் மாணவர்களுக்கு அதிக சிரமம் இல்லை.எனவே வலமிருந்து இடமாக அடுத்த ஆயிரம்,பத்தாயிரம் இட இலக்கங்களுக்கு மேலே ஆயிரம் என்பதன் சுருக்கக் குறியீடாக ஆ என்ற எழுத்தையும், லட்சம்,பத்துலட்சம் இட இலக்கங்களுக்கு மேலே லட்சம் என்பதன் சுருக்கக் குறியீடாக ல என்ற எழுத்தையும், கோடி என்பதன் சுருக்கக்குறியீடாக கோ என்ற எழுத்தையும் குறிக்கும்படி செய்ய வேண்டும்.

கோ	ல	ஆ
1,	23,	45,	678

இப்போது ஒரு கோடியே, இருபத்துமூன்றுலட்சத்து, நாற்பத்தைந்தாயிரத்து, அறுநூற்றுஎழுபத்தெட்டு என எட்டு இலக்க எண்ணை மிக விரைவாகப் படிப்பார்கள்.நாளடைவில் மேலே எதுவும் சுருக்க குறியீடு எழுதாமலேயே, காற்புள்ளி வைக்காமலேயே விரைவாக படிக்கும் திறனை அடைவர்.

முயற்சித்துப்பார்த்துவிட்டு முடிவைக்கூறுங்கள்!!

தங்களின் பின்னூட்டதை ஆவலுடன் எதிர் நோக்குகிறேன்!!!